بی وائی ڈی  پاکستان میں اسمبلنگ اور مینوفیکچرنگ یونٹ قائم کرنے کے لیے تیار

بیجنگ  (گوادر پرو)   دنیا کی سب سے بڑی الیکٹرک گاڑیاں بنانے والی کمپنیوں میں سے ایک بی وائی ڈی پاکستان میں اپنا اسمبلنگ اور مینوفیکچرنگ یونٹ قائم کرنے کے لیے پوری طرح تیار ہے۔

پاکستان کے سفیر، معین الحق نے منگل کو  بی وائی ڈی کمپنی لمیٹڈ کے سینئر ایگزیکٹوز کے ساتھ ایک ورچوئل میٹنگ کی، جہاں  بی وائی ڈی کے ایگزیکٹوز نے سفیر کو اپنی کمپنی اور پاکستانی مارکیٹ میں داخل ہونے اور اپنا مینوفیکچرنگ یونٹ قائم کرنے میں ان کی دلچسپی کے بارے میں آگاہ کیا۔

سفیر کے ہمراہ سفارت خانے کے کمرشل کونسلر بدر الزماں بھی تھے اور گوانگزو میں پاکستان کے قونصل جنرل نے بھی ملاقات میں شرکت کی۔ ملاقات کے دوران پاکستان میں سرمایہ کاری کے حوالے سے تفصیلی تبادلہ خیال کیا گیا اور دونوں فریقین کو تازہ ترین اپ ڈیٹس سے آگاہ کیا گیا۔

سفیر نے انہیں گاڑیوں کے سیکٹر میں سرمایہ کاری کے لیے حکومت پاکستان کی پرکشش پالیسیوں سے آگاہ کیا اور چینی انٹرپرائز کو پاکستان میں اس کی منصوبہ بند کوششوں کے لیے سفارت خانے کے مکمل تعاون کا یقین دلایا۔

 بی وائی ڈی پاکستان اور خطے دونوں کے لیے نہ صرف  ای وی کاریں بلکہ بسیں، وین، بیٹریاں، چارجرز کے ساتھ ساتھ دیگر متعلقہ اجزاء بھی تیار کرے  گی۔

یہ بات بھی قابل ذکر ہے کہ وزیراعظم پاکستان کا وژن ہے کہ وہ 2030 تک ملک کی سڑکوں پر چلنے والی کم از کم 30 فیصد گاڑیوں (بشمول موٹر سائیکلوں اور کاروں) کو  الیکٹرک  گاڑیوں میں تبدیل کر دیں۔